கரப்பான் பூச்சிக்கு கவிதை வாசித்த கீர்த்தி சுரேஷ்.. அதிர்ந்த அரங்கம்..

இயக்குநர் லிங்குசாமியின் ” லிங்கூ-அய்க்கூ” புத்தக வெளியீட்டு விழா நேற்று மாலை சென்னை ரஷ்யன் கல்ச்சுரல் சென்டரில் வைத்து நடைபெற்றது.

இதில் தயாரிப்பாளர் சங்க தலைவர் – நடிகர் சங்க பொதுச் செயலாளர் விஷால், நடிகை கீர்த்தி சுரேஷ், பேராசிரியர் ஞானசம்பந்தம், இயக்குநர்கள் பாலாஜி சக்திவேல், வசந்தபாலன், கவிஞர் பிருந்தா சாரதி, நடன இயக்குநர் ராஜு சுந்தரம், எழுத்தாளர் S.ராம கிருஷ்ணன் மற்றும் பலர் கலந்துகொண்டனர்.

“லிங்கூ – ஹைக்கூ ” நூல் வெளியீட்டு விழாவில் இயக்குநர் லிங்கு​​சாமி கூறியதாவது :

தாகூரின் கவிதை ஒன்று ஞாபகம் வருகிறது, சரியானவற்றை நீ தேர்ந்தெடுப்பதில்லை! சரியானவை உன்னைத் தேர்ந்தெடுக்கிறது. அவ்வாறு அமைந்தது தான் என்னுடைய அனைத்து.. நண்பர்களும் இந்த மேடையும்…

இங்கு மேடையில் உள்ள அனைத்து நபர்களுடனும் எனது நட்பு 25 வருடம் அல்லது 25 மாதங்களாக இருக்கலாம், ஆனால் இவர்களிடம் நீண்ட ஒரு பிடிப்பு உள்ளது. பாலாஜி சார் தான் முதல்முறையாக என்னுடைய கவிதையை படித்துக் காட்டி என்னை உதவி இயக்குநராக சேர்த்துவிட்டார். பாலாஜி சாரை எனக்கு அறிமுகப்படுத்தியவர் பாலன்.

புஷ்கின் இலக்கிய பேரவைக்காக ஒரு மூன்று வரி கவிதையை எழுத வேண்டும் என்று இந்த இடத்தில் முதன் முதலாக என்னை சந்தித்தார் பிருந்தா சாரதி. இப்போது அதே ஹாலில் என்னுடைய கவிதை புத்தகத்தை வெளியிடுவது மிகவும் மகிழ்ச்சியாக உள்ளது.

மூன்று வரி கவிதை விகடனில் எழுதி 30 ரூபாய் பணம் வந்த பிறகு எப்படியும் எழுதி பிழைத்துக் கொள்ளலாம் என்ற நம்பிக்கையில் தான் நான் சென்னைக்கு வந்தேன். இதற்கு முன்பு கவிதை வெளியீட்டு விழாவில் கூறியது போன்று நம்மிடம் இருந்து எல்லாம் போன பின்பும் கவிதை எழுதத் தெரிந்தால் பிழைத்துக்கொள்ளலாம். இங்கு வந்துள்ள அனைவருக்கும் நன்றி என்றார் இயக்குநர் லிங்குசாமி.

விஷால் பேசியது :- எனக்கும் கவிதைக்கும் எந்த சம்பந்தமும் கிடையாது. என்னை ஏன் லிங்குசாமி இங்கே அழைத்தார் என்று தெரியவில்லை. எனக்கு அவரை இயக்குநர் லிங்குசாமியாகத் தான் தெரியும். எனக்கு கவிதை , புத்தகம் படிக்கும் பழக்கம் இல்லை. ஆனால் இன்று முதல் இயக்குநர் லிங்குசாமி “ லிங்கு ஹைக்கு “ புத்தகம் கண்டிப்பாக என்னுடைய அறையில் இருக்கப் போகிறது. இது தான் நான் வாசிக்கப் போகும் முதல் கவிதை புத்தகம் என்றார்.

இந்நிகழ்ச்சியில் நடிகை கீர்த்திசுரேஷ் அவரே சொந்தமாக ஒரு கவிதையை எழுதி வந்து வாசித்து அனைவரிடமும் பாராட்டுக்களைப் பெற்றார். “ கரப்பான் பூச்சியை “ மையமாகக் கொண்ட கவிதை ஒன்றை கூறி இது தான் தனக்கு பிடித்த கவிதை என்று கூறினார்.

தமிழ் சினிமாவில் நடிக்கும் நடிகைகள் தமிழ் பேசாத இக்காலத்தில் கீர்த்தி சுரேஷ் தமிழில் கவிதை ஒன்றை கூறியது… தனக்கு பிடித்த கவிதை பற்றி பேசியது தங்களுக்கு ஆச்சரியமாக இருந்ததாக பேசிய எழுத்தாளர்கள் அனைவரும் கூறினார்கள்.

Leave a Reply

Your email address will not be published. Required fields are marked *